An parasurog-daga, paraprotektar-daga, o parasurog pankapalibutan sarong aktibista na naghihinguwang protektaran an daga kan kinaban asin an karapatan pantawo sa ligtas asin marhay kapalibutan.[1][2][3] An mga parasurog-daga parati nang mga myembro nin mga katutubong komunidad na nagpoprotektar sa saindang mga karapatan sa daga asin mga tradisyon na nakatakod sa daga.[1][4] Pigsasayumahan kan mga parasurog-daga an terminong "protester" nin huli ta nagtutubod sinda na igwa ini nin negatibong mga konotasyon asin koneksyon sa kolonyalismo; sinasabi nindang sinda naggigibo nin sagradong obligasyon sa paagi nin daing-dahas na pagtumang sa mga aktibidad na nagsasapeligro sa daga.[5] An daga ibinibilang na sagrado kan mga katutubo asin an pag-ataman saka pagprotektar sa daga ibinibilang na obligasyon tanganing tawan onra an saindang mga apuon, an presenteng mga kahimanwa, asin an masurunod na henerasyon.[6]
An mga parasurog sa daga napapaatubang sa grabeng persekusyon kan mga poderosong politikal asin komersyal na alyansa na nagdidilihensya sa paghigop nin yaman-kapalibutan asin debelopment. An United Nations Human Rights Council (UNHRC) nadeterminar na an mga parasurog sa daga 'kabali sa mga parasurog sa karapatan pantawo na pinakabuyagyag asin pinakang nasa peligro.'[1] Nagreport an Global Witness nin 1,922 na panggagadan sa mga parasurog-daga sa 57 nasyon sa katahawan nin 2002 asin 2019, asin haros mga katutubo an 1/3 kan kagabsan. Siring man, dai pa kumpleto an dokumentasyon kan siring na kadahasan. An UN Special Rapporteur sa karapatan pantawo nagbareta na mananggatos na parasurog-daga an tinatakot, dinadakop, o hinaharas sa kada sarong ginagadan.[1]
© MMXXIII Rich X Search. We shall prevail. All rights reserved. Rich X Search